الاسئله الشائعه حول جروب جت فى السوسته

الاسئله الشائعه عن جروب جت فى السوسته 

#أسئلة_السوستجية
.
.
#سؤال_1 / ايه قصة جت في السوستة ؟
محمد عبدالغفار ( الشهير ب : محمد جيرى ) مؤسس الجروب كان عنده مشكله في الخصية وكان قلقان ان كان هيضره مستقبلا في جوازه , وعلشان الموضوع حساس جمع ١٠٠ من اصدقاءه المتزوجين علشان يستشيرهم فى مشكلته وال 100 جابوا 100 كمان و ال 100 جابو 1000 لحد ما وصل للعدد ده.
.
.
#سؤال_2 / اشمعنى اختار المؤسس اسم للجروب ( جت في السوستة ) ؟
هو كان ناوي يسميه ( جت في الخصية ) بس لقاها تقيلة شوية فقرر يسميه ( جت في السوستة ).
.
.
#سؤال_3 / بعد ما الجروب انتشر , ليه مغيرتوش الاسم ؟
الاسم ده مميز جدا لانه غير فكر ملايين الناس الي بتبص على الكتاب من بره بس و اثبت للدنيا كلها ان المحتوى اهم بكثير من العنوان , الاسم دلوقتي بقى براند وليه صيته الي انتشر بيه و سمعته الكويسة الي بين الناس بسبب أفعال الأعضاء الي فيه , وبينضرب بيه المثل , فمفيش داعي لتغيير الحاجة الجميلة دي , وان كان هيحصل تغيير كان يبقى لازم قبل ما نوصل 5000 عضو ,, وصدقني لو كان الاسم اتغير ساعتها مكانش الجروب هيوصل للي وصله دلوقتي.
.
.
#سؤال_4 / ايه الرسالة والهدف من الجروب ؟
- رسالتنا : رسالة حب وتعايش بين كل الناس وزيادة الوعي الاجتماعي ونبذ التفرقه والعنصريه علي اَي أساس كان ، عرقي ، ديني ، مذهبي أو جنسي

- رؤيتنا : اننا نرجع لزمن سابع جار وولاد الحتة واحترام الكبير وصون الأعراض والسند في الأحزان قبل الأفراح

- مهمتنا : وضع قواعد تبعد الناس عن الخلافات بكل انواعها مع السماح بنشر كل الموضوعات اللي تقرب مابينهم وتخلق حالة تراحم وسطهم

- نظريتنا : الهلس الهادف هو تعريف الشاب المصري اللي طابع المرح والألش مسيطر عليه بس وقت الجد بيجري عشان يساعد أي حد محتاجه ، يعني بيعمل الاتنين هلاس بس راجل ، ابن نكتة وابن أصول في نفس الوقت.
.
.
#سؤال_5 / مين ينفع يدخل الجروب ؟
شروط الانضمام :
- أن يكون طالب العضوية رجلا
- أن يكون الحساب فعال من أكثر من سنة
- أن لا يكون الإسم مزخرف - عربي أو إنجليزي
- أن لا يكون الإسم وهمي
- أن لا تكون خاصية الرسائل مغلقة
.
.
#سؤال_6 / ليه البنات ممنوعة من الدخول للجروب ؟
احنا مش ضد البنات ومقدرين دورهم وهما اساس المجتمع , فيهم امى واختى وبنتى , لكن احنا هنا رجاله بس علشان ناخد راحتنا فى الكلام , ونرفع الحرج في السؤال و ميبقاش في تصنع ومحدش يحلو قدامهم باي شكل من الاشكال.
.
.
#سؤال_7 / نزلت بوست ومتقبلش , ايه انواع البوستات الي مبتتقبلش ؟
- الإباحية , السياسة , الكورة ( أندية ) والفتي في الدين
- الترحيب بدخول الجروب وبوستات صباح ومساء الخير
- تفسير الأحلام او الخوض في الديانات او تجارة العملات
- كوميكات أو منشورات منقولة من صفحات اخرى أو مكررة
- منشورات فيها لينكات - خارجية او هاشتاجات لصفحات او جروبات خارجية
- منشورات شير او سكرينات من صفحات شخصية أو جروبات اخرى
- التسويق الشبكي و التربح من اللينكات والخ
- منشورات لم التفاعل و طلب الفولو والشير وملي الاستبيانات
- منشورات الحب والغزل او النعي وطلب الدعاء
- منشورات طلب الهاكر او طلب ريبورتات لأكاونتات أو صفحات
- منشورات طلب وسايط او طلب معلومات عن اي شيء يمس الأمن القومي
- منشورات التشهير بالشركات او الافراد او الشكاوى ضد اشخاص أو مؤسسات
- منشورات تحتوي صور سيدات أو رسومات ما عدا الحالات الطارئة
- المنشورات المجهولة التي لا تحتوي معلومات كافية او اسألة مبهمة
- طلب السفر للخارج أو اعلانات وظائف للخارج
- منشورات طلب معلومات عن شخص معين
- منشورات بيع أرقام الهواتف او طلبها
- منشورات الألغاز المكررة
.
.
#سؤال_8 / ليه في بوستات مش مخالفة بتتأخر في النزول ؟ وايه الحل ؟
بسبب عدد البوستات اللي بتنزل لنا ف الفلتر بتوصل ل 3000 بوست ف الساعه اغلبها مخالف ومتكرر ودا بيعطلنا عن قبول البوستات المش مخالفة( راجع سؤال 7 ) والحل انك تمسح البوست القديم وتنزله تاني من الاول - لو البوست مش مخالف - علشان يطلع فوق, لان الفلتر بيظهر قدامنا من الاحدث إلى الأقدم ↓↓ مش العكس.
.

.
#سؤال_9 / ناس كتير بشوفها بتتطرد يوميا من الجروب , ايه سبب طرد الاعضاء
راجع بوست قواعد النشر من اللينك ده
- إضافة بنات للجروب
- التطاول على الأعضاء أو الأدمن
- التعصب الكروي والتطاول على أفرقة و منتخبات أو لاعبين
- وضع لينكات غير مرتبطة بموضوع المنشور في التعليقات
- الاسماء المزخرفه
- تعليقات تخريب المنشور
- التعليقات السياسية او السكس او الفتي الدين
- الاعلان فى التعليقات على اشياء غير مرتبطه بالمنشور
- التسبب في ضرر لأحد أعضاء الجروب
- نشر سكرينات من الجروب للخارج
- الهاكرز
- الفتي في الإستشارات الطبية
- ارسال رسائل طلب مساعدات على الخاص للأعضاء
- تعديل المنشور بعد قبوله وإضافة شيء مخالف فيه
.
.
#سؤال_10 / ايه لجان الادارة ووظيفتها في الجروب ؟
في عندنا 5 لجان رئيسية حاليا :
- اللجنة الإدارية : البت في كل ما يخص الجروب.
.
- اللجنة التنفيذية : متابعة تطوير الجروب و الإشراف العام.
.
- لجنة المساعدات : بتستقبل طلبات المساعدات وتفرزها.
.
- اللجنة الإعلامية : تنسيق كل ما يخص جت في السوستة اعلاميا.
.
- لجنة الثقافية والفنية : رفع الوعي الثقافي في الجروب وتقديم برامج متنوعة .
.
- لجنه الوظائف : بتستقبل طلبات الوظائف من الأعضاء و عروض التوظيف من الشركات وتوفق ما بينهم.
.
- اللجنة القانونية : بتستقبل مشاكل الاعضاء القانونية وتحاول المساعدة وتقديم الحلول
.
.
#سؤال_11 / ليه فيه بوستات تافهه بتنزل وسايبين المهم والمساعدات ؟
الجروب هدفه الاسمى الهلس الهادف نوصل كلنا لمرحلة اننا بنسند بعض واحنا بنضحك ومبسوطين - بوستات المساعدات مش بنقبلها الا بعد ما نتأكد منها ونبعت حد من طرفنا يتابع الحالة و بالتالي في بوستات كتير جدا ممكمن انت تنقلها من غير تأكيد و احنا لما نتواصل معاهم ونتأكد نلاقي الوضع عكس ما هو منشور وبالتالي مننزلهاش . و البوست التافه بالنسبه لك , خلى حد غيرك يضحك ويطلع من مود وحش كان فيه !.
.
.
#سؤال_12 / حاولت انزل بوست ملقتش مكان للكتابة ؟ هل انا ممنوع من النشر ؟
انت مش ممنوع من النشر لا , البوستات كل يوم بتتقفل من الساعة 7 مساءا للساعة 9 مساءا لاعطاء فرصة للأدمن لفلترة البوستات الي نزلت وتخفيف الضغط شوية.
.
.
#سؤال_13 / نزلت بوست طلب تغيير خلفية او ايديت بالفوتوشوب ومتقبلش ؟
البوستات دي كترت جدا و عشان ننظم العملية شوية عملنا بوست خاص بيها ممكن حضرتك تنزل طلبك لتعديل الصور وتقدر تلاقيه لما تدور في خانة البحث الخاصة بالجروب عن الهاشتاج ده #فوتوشوب_السوستجية .
.
.
#سؤال_14/ نزلت بوست بسأل عن دكتور عيون او مين في المنطقة الفلانية عشان اتعرف عليهم ومنزلش ؟
اكيد البوست ده نزل منه قبل كده ومنعا للتكرار البوستات المشابهة مبتتقبلش , يا ريت حضرتك تستخدم خاصية البحث في الجروب قبل ما تنزل سؤال , لو بحثت وملقتش اجابة ساعتها ممكن تبعت سؤال في بوست جديد.
اما بالنسبة للبوستات الي بتسأل فيها عن حد معين او عن الناس الي من المنطقة الفلانية من غير ما تقول عايز ايه فدي ممنوعة تماما .
.
.
#سؤال_15 / نزلت بوست عن حالة محتاجة مساعدة ومتقبلش , ايه الحالات الانسانية الي بتساعدوها وايه الي بيترفض ؟
بوستات المساعدات ليها شروط :
- تحتوي صور واضحة للحالة وكافة التقارير - ان وجدت -
- تحتوي أرقام للتواصل وعنوان واضح
- ان لا تكون الحالة منقولة من مكان اخر
- سيقوم فريق المساعدات بالتقصي عن الحالة أولا وقد لا يتم النشر
.
.
#سؤال_16 / نزلت حاجة عايز ابيعها ومتقبلتش / نزلت اعلان ومتقبلش , ليه ؟
الإعلانات ليها شروط عشان تتقبل :
- تنزل يوم السبت أو الأربعاء فقط
- صور واضحة وكاملة للمنتج
- تفاصيل كاملة و معلومات تواصل واضحة
- اضافة #إعلانات_السوستجية
- ممنوعات الإعلانات :
--الإعلانات للشركات الكبرى
-- إعلانات شبكات الإنترنت والمحمول
-- إعلانات شركات الأدوية
-- الإعلان عن المحظورات والممنوعات القانونية
.
.
#سؤال_17 / نزلت بوست طلب شير من صفحتي عشان اخد ( تلفون , شقة , عربية , غسالة , ميكروويف ,, الخ ) ومتقلبش ؟
اولا مفيش حد هيديلك حاجة بمجرد انك تعمله شير , ودائما هتلاقي الشروط تعقيدية عشان هما عارفين انهم مش هيدوك حاجة و لما انت تحاول و تعمل شير مرة واتنين و الف هما هيكونوا استفادوا منك وانت لا , ثانيا بوستات الشير و طلب الفولو ممنوعة من الجروب ( راجع سؤال 7 ) والمنع اشد للبوستات دي لاستغلالها الناس.
.
.
#سؤال_18 / انا بشوف بوستات كتير تافهة / مخالفة بتنزل , اعمل ايه لما اشوفها ؟
احنا اتفقنا قبل كده ان مفيش حاجة تافهة وان في اختلاف وجهات نظر لازم نحترمه ونرتقي بنفسنا شوية (راجع سؤال 11 ) , المقياس عندنا هل البوست الي نزل ده - مخالف ولا مش مخالف - لو في بوست مخالف نزل مننا بالخطأ يبقى لازم تعمله ريبورت او تمنشن حد من الادمن واحنا هنتصرف علطول ان شاء الله.
.
.
#سؤال_19 / بشوف كومنتات مخلة بالاداب او فيها شتايم , اعمل ايه ؟
اي كومنت تلاقيه فيه شتايم او كلام مخل لازم حضرتك تبلغنا علطول عن طريق الريبورت او منشن لحد من الادمن واحنا هنتصرف علطول ان شاء الله.
.
.
#سؤال_20 / لو لمينا من كل واحد جنيه هايكون معانا 2 ونص مليون جنيه نفتح اى مشروع ليه مانعملش الموضوع ده ؟
الموضوع مش سهل واحنا شغالين عليه وفى ناس متخصصين بيدرسوا الموضوع من الناحيه القانوينه وان شاء الله قريب هايكون فى مشروع يجمعنا كلنا.
.

.
#سؤال_21 / ليه مبتتكلموش عن بورما وسوريا و المشاكل الي بتحصل في العالم حوالينا ؟
لان دايما الموضوع هيتحول من انساني لسياسي و احنا اتقفنا اننا ملناش في السياسة , ده غير ان مفيش بإيدينا حاجة نعملها ليهم غير الدعاء او التبرع وكل واحد على قد ما يقدر , مش عايزين ندخل الجروب في حاجة هو مش قدها.
.
.
#سؤال_22 / هل فعلا بقى للجروب صفحة ؟ ونوصلها ازاي ؟
فعلا بقى في صفحة للجروب وتقدروا تدخلوها من هنا : جت في السوستة
.
.
#سؤال_23 / ليه عملتوا صفحة ؟ وهل هتأثر على الجروب ؟
الصفحة اتعملت عشان في جروبات كتير معمولة بنفس الاسم و عملوا صفحات كمان باسمنا وبقو ينشروا حجات مسيئة , و بالتالي هنلبس احنا في الحجات الغلط دي من غير ما نكون احنا السبب فيها و بالتالي كان لازم واجهة اعلامية رسمية ظاهرة قدام الناس كلها واضحة وهي الصفحة وده برضه هيساعدنا اننا نوثق الجروب و نقفل بقية الصفحات والجروبات المزيفة ,, و الجروب هيفضل زي ما هو بنفس قوانينه مفيش حاجة هتتغير.
.
.
#سؤال_24 / ليه الاسامي المزخرفة ممنوعة ؟
عشان بيكون في صعوبة على الادمن لما ييجي يدور على الشخص ده لو عمل مخالفة واحتاج يوصل له
.
.
#سؤال_25 / بشوف ناس بتطلع على الجروب لايف , مين الي ممكن يطلع معاكم ؟ ولو ينفع انا اشارك معاكم واطلع لايف وافيد الناس واتكلم معاهم في موضوع معين , أعمل ايه ؟
الكل مرحب بيه انه يطلع معانا لايف طالما هيتكلم في موضوع هادف أو هيعرض موهبة كويسة , الي حابب يطلع ممكن انه يتواصل مع مسؤولي #اللجنة_الإعلامية الأدمن Ahmed Mohamed والأدمن Mahmood Shaaban
.
.
#سؤال_26 / عندي موهبة وحابب أعرضها ممكن انزل بيها بوست ؟
منشورات المواهب لها شروط عشان تتقبل :
- تحتوي هاشتاج #مواهب_السوستجية
- يفضل النشر يومي الخميس والجمعة
- تحتوي عنوان مناسب للموهبة وان تكون خاصة بصاحب المنشور
- ممنوعات المواهب :
-- المواهب التي تحتوي أي اسقاط ديني او ألفاظ خارجة أو عنصر نسائي .
.
.
#سؤال_27 / انا عندي افكار عايز اطرحها عليكم , ابعت لمين ؟
ممكن تفتح قائمة أعضاء الجروب و هتلاقي الأدامن ابعت لأي حد منهم الفكرة الي عندك.
.
.
#سؤال_28 / انا عندي استعداد ابقى مشرف معاكم واساعد في الجروب , اكلم مين ؟
ممكن تفتح قائمة أعضاء الجروب و هتلاقي الأدامن ابعت لأي حد منهم طلبك ده و هما هيوصلوه للجنة الإدارية .
.
.
#سؤال_29 / انا عايز ابلغ عن شكوى او مشكلة بيني وبين عضو او ادمن , ابلغكم ازاي ؟
ممكن تفتح قائمة أعضاء الجروب و هتلاقي الأدامن ابعت لأي حد منهم الشكوى الي عندك .
.
.
#سؤال_30 / انا سمعت ان الجروب متضيق عليه امنيا , الكلام ده صحيح ؟
الكلام ده غير صحيح بالمرة ومفيش علينا اي تضييق امني باي شكل من الاشكال.
.
.
#سؤال_31 / ايه الي اقدر اعمله عشان اساعدكم ؟
- تابع البوستات الي بتنزل يوميا وحاول تساعد فيها .
- لو مش هتقدر تفيد صاحب البوست سيب كومنت بأي حاجة عشان ترفع البوست.
- اخرج من اي جروب او صفحة مقلدة لينا او باسمنا او فيها جزء من اسمنا.
- الالتزام بالقوانين.
- عدم نشر بوستات مخالفة ( راجع سؤال 7 ).
- بتوعية بقية الاعضاء بالقوانين.
- عمل ريبورت على الكومنتات او البوستات في حال وجود مخالفة .
.
.
#سؤال_32 / ازاي أوصل للأدمن والمشرفين الي في الجروب وأكلمهم ؟
ادخل على قائمة الاعضاء الخاصة بالجروب و روح على خانة المشرفين والادارة و هيطلعلك الادمن كلهم ممكن تدخل تكلم اي حد فيهم.
.
.
#سؤال_33 / ليه مش عارف اعمل شير جوه الجروب ؟ ليه الشير مقفول عندي ؟
الشير مش مقفول عندك انت بس , الشير مقفول لكل الاعضاء في الجروب لان الجروب سري وبالتالي مينفعش انك تعمل شير لأي حاجة بره الجروب ,, ممكن انك تاخد اللينك بتاع البوست و تحطه في مكان البوستات في صفحتك الشخصية , وده هيعمل شير ولكن محدش هيشفوله الا اصدقاءك الي موجودين في الجروب هنا بس
.
.
#سؤال_34 / نزلت بوست لحد من عيلتي او اعرفه شخصيا مختفي / مفقود ومتقبلش ليه ؟
نشر المتغيبين ليه شروط :
- أن يكون الناشر قريبا للشخص ويحتوي المنشور صور واضحة للشخص المتغيب
- تحتوي صورة محضر التغيب / رقم محضر التغيب وارقام التواصل
- تحتوي معلومات عن اخر مكان شوهد فيه المتغيب والتاريخ
- أن لا يكون المتغيب بكامل قواه العقلية / فوق 16سنة ( للرجال )
- بعد التأكد من الحالة يتم النشر باسم الصفحة ويرسل اللينك لصاحب البوست
.

.
#سؤال_35 / بسمع كتير ناس بتقول ان الجروب للهلس الهادف ,, يعني ايه الهلس الهادف ؟
الهلس الهادف هو تعريف الشاب المصري اللي طابع المرح والألش مسيطر عليه بس وقت الجد بيجري عشان يساعد أي حد محتاجه ، يعني بيعمل الاتنين هلاس بس راجل ، ابن نكتة وابن أصول في نفس الوقت.
.
.
#سؤال_36 / ليه بوستات الصلاة على النبي ممنوعة وليه بوستات التفاعل الديني من نوع ( اذكر الله ) ممنوعة ؟
البوستات دي ممنوعة لكثرتها ,, ولو سمحنا لكل البوستات من النوع ده انها تنزل هتملى الجروب و مش هيبقى في غيرها في التايم لاين ,, ولكن بتنزل بشكل دوري من الصفحة الرسمية بتاعتنا و تقدر تتابعها عن طريق الهاشتاج : #صلوات_السوستجية
.
.
#سؤال_37 / ليه البوستات المنقولة ممنوعة ؟
المنقول ممنوع عشان احنا بنبقى محتاجين ارقام تلفونات وناس نتابع معاها و ساعات البوستات المنقولة دي مبيبقاش فيها المعلومات كاملة أصلا .
وفي 95% من الأوقات بتكون الحالات خلصت من مدة طويلة بس لسه متداولة في الإنترنت وبالتالي ده يضر مصداقيتنا لما ننزل حالات خلصانة اصلا و نسبب إزعاج للأهالي بشكل أو بأخر .